我到嗰一刻直頭呆咗! 我估唔到我個洗手盆竟然係向左歪咗大約15度!? 因為佢公司只係賣啲大陸洗手盆. 而個價同歐洲牌子幾乎一樣, 我梗係自己買個歐洲牌子盆之後俾錢佢裝啦! 點知一個洗手盆洞都可以開成咁!? 當日裝盆嗰日, 我有同個"師傅"通過電話, 佢態度係唔想開咁. 佢同我講話未裝水喉唔知點開喎! 我心諗: 唔裝個盆點樣裝水龍頭!? 個水龍頭係喺個盆上面. 我都怕佢玩嘢所以冇即場噴佢, 好聲好氣咁同佢講我俾咗錢開洞. 但結果佢都係半玩嘢地亂咁裝鏡櫃上的燈箱膠片同埋個洗手盆. 好彩我啲裝修師傅肯捱義氣幫我拆咗個盆之後夾硬扭返正個盆重新裝過. 老實講一分錢一分貨, 我係喺中大讀咗個室內設計校外課程, 冇諗過啲櫃會做得好靚. 不過都冇諗過啲櫃會裝到亂七八糟. 要我啲裝修師傅同埋我親自執手尾囉!

佢兩公婆唔知係咪知道我喺度投訴佢, 尋日下午覆咗我老婆whatsapp. 話等中秋後廠送啲鏍絲落嚟再搵師傅裝過. 但係咁多日我已經自己去度啱個呎吋(佢原先俾啲鏡櫃用的膠片根本唔fit位)去咗膠片舖整咗四塊新膠片. 自己拎電鑽開返啲較為正常合理啲洞重新裝緊. 我四十歲人第一次攪到自己用電鑽騎喺木梯上幫"師傅"執漏. 不過因為佢之前亂咁鑽啲洞我啲膠片又係半透明, 始終都係睇倒之前個"師傅"亂咁鑽啲洞. 睇嚟我入伙後得閒啲要搵啲嘢補返啲洞洞再裝過. 因為個鏡櫃出事得太嚴重, 一直都唔發覺原來連地櫃都出咗事......

剛幫襯咗, 廚櫃冇咩問題. 但廁櫃真係不知所謂. 個鏡櫃本身已經加咗錢. 點知個"師傅"嚟安裝時啲廣告鏍絲亂咁裝, 左右上下都不對稱. 搵返老闆投訴又話師傅按我太太指示安裝所以唔負責. 我真係激到跳起, 我太太有冇可能叫個"師傅"亂咁裝啲廣告鏍絲. 咁既手工簡直連學徒都不如. 仲有, 呢間嘢冇咩交帶. 唔好似為佢哋兩公婆年紀咁大係老行專. 其實係冇咩職業道德.