食正韓風 「情侶檔拍住創業」

一個來自香港，一個來自韓國，沒想到可以在紐西蘭工作假期相遇，並發展成為情侶。他們其後更一同到澳洲工作假期，但工作假期後便要各自回到自己的地方，那怎麼辦？Lizzy就想出創業，但要找一些與韓國有聯繫的生意概念，故創辦了網上店，其後更於觀塘租設樓上舖位，共創「愛情結晶」。

忽發創業商機

  兩口子來自不同地方，要見面真的要想想辦法，Lizzy提及：「當初分隔兩地，希望可以成日見面，所以就諗諗有冇啲咩生意可以係香港同韓國合作，咁啱嗰期韓風潮，男朋友又係韓國人，佢同嗰邊啲人溝通都方便啲，所以我哋就突然諗到不如做韓國代購啦！同埋我自己又識韓文，又鍾意用韓國嘢，每隻產品我都會試用過，之後就想將好嘅嘢帶番嚟香港介紹俾其他人囉！」She goes to seoul本身只是靠facebook的粉絲頁，其後存貨多了便租了單位作office，但當中也有擺放產品供客人使用的位置，「我哋呢度可以俾個客慢慢睇、慢慢揀同慢慢試，唔會好似出面咁有人sell佢哋，你知啦！sell得多啲客其實唔會幾鍾意，會覺得我哋阻住佢哋揀嘢，俾佢哋慢慢揀，見到新奇嘢咪大家傾吓計交流吓！」Lizzy務求能令顧客揀得舒適，令他們再回來購物。

勤力至上 成功賺取第一桶金

  近年韓風潮直迫香港，韓星、韓劇不在話下，連韓國護膚品化妝品亦大受歡迎，多間韓國護膚品及化妝品店成行成市，Lizzy又有何策略？此方面其實Lizzy男朋友可謂佔盡天時地利人和，Lizzy表示：「由男朋友喺韓國入貨，貨價可以平3成，佢就負責入貨，我就負責銷售囉！有咩策略？其實都冇乜架，自己勤力啲工作囉！呢度2月尾開到而家，頭兩個月一至日都番工，facebook如果有人問嘢，我哋半夜未訓都會回架！希望勤力啲快啲回本嘛，好彩第1個月已經回到本，之後第兩三個月盈利都有十二萬左右啦！」開業三個月已經賺到廿五萬左右，情侶檔一條心果然好重要。

韓國「正貨」 情牽兩地

  由於Joe與Lizzy的努力，店舖已經站穩陣腳，並更得到眾多客戶愛戴與媒體的關注。這對於隻身來港發展的Joe可說是非常安慰。在香港雖然能與Lizzy朝夕相對兩口子甜甜蜜蜜，但身為韓國「正貨」的Joe同樣心繫家人。非常孝順的他除了在回去入貨時順便探親，更會將She goes to seoul所有的媒體專訪翻譯成韓文，讓爸媽了解他與Lizzy在香港的「愛情結晶」。

未來大計 便利顧客

   She goes to seoul暫時只是一間小店子，來年將會擴充，「而家觀塘都有一定嘅客源，但對啲客嚟講始終都冇咁方便，所以我哋物色緊其他地方開多一間舖，等啲客方便啲，不過而家都冇定喺邊呀，可能喺尖沙咀、旺角、銅鑼灣都未定！」Lizzy補充說，「同埋我哋遲啲都會繼續賣零食同衫，雖然而家少啲貨，但俾啲時間我哋吖，之後一定會多」。