推介--尋寶

尋找隱世貓貓Café !

發表於2013/6/28

觀塘一直俾人嘅印象係工商業大廈密集, 人來人往, 辦公時間期間條街更加係迫到飛起! 喺呢區嘅食肆, 好多都係以打工仔為對象. 餐廳賣嘅, 好話唔好聽, 真係好似麥兜故事話齋:

「咪又係黎黎去去有肉呀有啲菜呀撈埋撈埋打個生粉芡上面個啲野咁囉！廿零蚊個餐又湯又盛唔通有得你食天九翅咩,求求其其有啲肉有啲菜蛋白質澱粉質撈撈埋埋打個白汁茄汁黑椒汁咁食得你懵口懵面咪返去返學返工返廠返寫字樓囉！

店舖圖片

但係又有邊個會估到原來喺工廠大廈入便, 其實隱藏左唔少令人意想唔到嘅Café, 食肆!? 喺成運工業大廈入便, 就有間叫做梅子工場嘅Café喇. 呢間Café 嘅特別之處係咩? 一睇張相, 相信都唔駛等多講喇掛! 冇錯! 呢間係一間貓Café, 入便有超過八隻貓仔接待食客! 見到咁多可愛嘅貓仔, 真係未坐底就已經加哂分啦!

周圍都係貓!

其實猫Café 喺香港都有好幾間, 但一般都係集中喺旺角, 銅鑼灣呢啲地方. 好似梅子工場喺觀塘開就真係好罕見喇! 梅子工場入便嘅貓仔都係以食物或者飲品嚟命名, 例如芝麻, Horrick, 紅豆等等. 佢地一啲都唔怕生保, 我食嘢嘅時候, 佢地仲跳上的隻腳度添!

芝麻（右）, Horrick (左)

講開嘢食方面, 呢度嘅嘢食好有家庭式風味, 而且選擇好多, 有咖哩, 日式烏冬, 薄餅等. 基本上只要有材料, 老闆都會親自下廚整俾你食. 飲品方面當然唔少得啦! 除左Latte, Cappuccino外, 仲有好多品同類型嘅特飲. 食物同飲品質素方面尚算唔錯. 下次好機會一定再去試下, 兼探下芝麻佢地!