推介--美食

飲食界奧斯卡百份百餐廳 100%懷舊冰室 X 工業風

發表於2017/6/27

Dining娜話晒都半個偽文青,假日去下遊山玩水打個卡真係少不免。出發當日天氣不似預期,仲諗住可以入粉嶺谷埔同牛牛影下相,可惜事與願違。同行朋友話要一解掃興之愁,帶我去食拎過飲食界奧斯卡嘅 百份百餐廳 。

100%懷舊冰室 X 工業風 設計回到舊時

百份百餐廳嘅招牌菜「咖喱牛坑腩」曾兩次獲得「咖喱牛腩天王」嘅殊榮,係講究時尚裝潢的本土餐廳。除咗主打一系列香港地道菜式,多間分店仲自設麵包專櫃,我仲未走入餐廳,已經聞到一陣陣新鮮出爐麵包嘅香味。睇住餐廳外牆貼上唔同時代嘅九巴,好似走咗入時光隧道,唔知幾時會放埋最新英倫風車身設計嘅巴士呢?

坐入卡位,有種化身王家衛電影女主角嘅feel,喺度慢慢呷口奶茶。抬頭一望,發現百份百餐廳樓底都幾高,懸掛住舊時冰室嘅天花吊扇,裝潢走流行嘅工業風,各種金屬配件,將新潮同懷舊觀感二合為一,襯托出別具風格嘅本土情懷!

百份百餐廳唔同角落都有懷舊裝飾,鎢絲燈膽、天花吊扇、懷舊廣告海報等。

餐廳最近新推唔同口味嘅泡飯,其中「方魚蠔仔雜菌魚湯泡飯」同「瓜粒海鮮魚湯泡飯」,都係份量十足嘅夏日推介,而Dining娜當然唔會錯過充滿潮式風味嘅蠔仔泡飯!用大地魚炸成嘅方魚,令泡飯更鹹香脆口。更正嘅係魚湯底鮮甜濃郁,新鮮蠔仔粒粒肥美飽滿,加入白菜、鮮菇、肉碎,仲有芫茜同蔥花做點綴,啱晒大熱天時無胃口食飯嘅你哋,聞到咁清甜嘅海鮮風味都即刻食指大動!

方魚蠔仔雜菌魚湯泡飯食材豐富,鮮甜嘅蠔仔、白菜、菇菌同肉碎,份量十足又美味!

晏睡晏起,夾正早餐嘅尾水就可以揀「香煎豬扒美式早餐」。聽講百份百餐廳得知食客鍾意食煎蛋但又怕蛋白太生,於是首創自家煎蛋製法 ── 半焗流心蛋!廚師先煎後焗,配合黃金時間,先可以做出流心蛋黃被嫩滑全熟蛋白包住,蛋白邊外脆內嫩!打工仔一族再醒返一杯Lipton香滑熱奶茶,歎一杯快活過神仙,立即有衝勁做嘢!

一日之計在於晨,美式早餐有齊Juicy豬扒、半焗流心蛋、火腿、茄汁焗豆、配埋蒜香牛油多士!夠晒能量衝到食Lunch!

重視健康嘅友人就點咗「健康清炒五色蔬」,有蓮藕、四季豆、茄子、雲耳同南瓜片,新鮮即炒,鑊氣十足!五種蔬菜口感各有不同,但味道好夾,唔會互相搶大家風頭。蓮藕、雲耳爽口、茄子油而不膩;最特別之處就係餐廳不計成本,為咗畀顧客食出有住家風味又營養豐富嘅菜式,特登將營養價值極高嘅藜麥加入一貫軟熟嘅白飯當中,希望顧客食得健康!

加咗响白飯入面嘅藜麥,含Omega 3、膳食纖維、維他命等豐富營養價值,真係食得健康又有「營」。

而家都好少聽人講「犀飛利」,犀飛利即係以前70年代用嚟形容好犀利、好勁、無懈可擊咁解。而今次百份百餐廳嘅「犀飛利銀芽肉絲脆麵」,更加有以前「奇哥」年代嘅味道。堆砌成山丘形狀、又鬆又高嘅炸脆麵,當肉汁由上而下淋落脆麵、均勻流入每一根麵條,每一啖都脆口又juicy!

百份百餐廳
地址: 新界粉嶺馬適路1號逸峯廣場地下6號舖
電話:2554 9100
營業時間:07:00-22:00

分享到: facebook twitter google+ 新浪微博
你可能感興趣的
「樓上食譜」馬來西亞肉骨茶  驅寒暖胃靚湯

「樓上食譜」馬來西亞肉骨茶 驅寒暖胃靚湯

冬日溫度降低,讓寒冬變暖冬的方法,就是給自己來一隻暖暖的靚湯,葷素不忌,甜鹹皆可,飲下去就感覺幸...

【美食】2015-12-15
「樓上食譜」黃豆燜豬蹄  美容又暖身

「樓上食譜」黃豆燜豬蹄 美容又暖身

黃豆燜豬蹄是一道美容又暖身的居家美食,女仔經常食用,會有意想不到的美容功效,肌膚雪白紅潤,富有彈...

【美食】2015-12-09
「樓上食譜」牛油果白蝦仁沙拉

「樓上食譜」牛油果白蝦仁沙拉

牛油果是一種營養價值很高的水果,含多種維生素、豐富的脂肪和蛋白質,鈉、鉀、鎂、鈣等微量元素含量也...

【美食】2015-11-25
廣告
可以在這裡找到想要的商舖,也可以通過UPPERSHOP平台免費發佈自己的商舖,推廣商舖的更多優惠及活動信息。
Copyright © 2012-2018 uppershop.hk
樓上舖網絡平台 版權所有 不得轉載
追蹤我們
樓上舖指南